نامور کرکٹرز ڈیوڈ وارنر اور کین ولیمسن نے بھی روزے رکھنا شروع کردیئے

دنیائے کرکٹ کے نامور کھلاڑی ڈیوڈ وارنر اور کین ولیمسن بھی رمضان المبارک میں روزے رکھنے کے تجربے سے گزر رہے ہیں۔ کیوی اور کینگروز کھلاڑیوں کے اس اقدام سے ان کے مداح بہت خوش ہیں۔

خیال رہے کہ ڈیوڈ وارنر کا شمار آسٹریلیا کے مایہ ناز اوپنرز میں ہوتا ہے جبکہ کین ولیمسن نیوزی لینڈ کی کرکٹ ٹیم کے کپتان ہیں۔دونوں کھلاڑی ان دنوں انڈین پریمیئر لیگ (آئی پی ایل) میں شرکت کیلئے انڈیا میں موجود ہیں اور حیدر آباد سن رائزرز کی نمائندگی کر رہے ہیں۔

غیر ملکی میڈیا کے مطابق وہ ان دنوں اپنے مسلمان کھلاڑیوں کیساتھ مل کر رمضان المبارک کے روزے رکھ رہے ہیں۔دونوں غیر ملکی کھلاڑیوں کو روزے رکھنے کی ترغیب افغان کرکٹرز محمد نبی، خلیل احمد اور مجیب الرحمان نے دی۔

افغان کرکٹر نے افطاری کے موقع کی ایک ویڈیو سوشل میڈیا پر شیئر کی جسے بہت پسندیدگی کی نگاہ سے دیکھا جا رہا ہے۔

سوشل میڈیا پر شیئر ویڈیو میں سنا جا سکتا ہے کہ راشد خان نے سوال پوچھا کہ ڈیوڈ وارنر روزہ رکھ کر کیسا محسوس کر رہے ہیں تو اس کا جواب دیتے ہوئے ان کا کہنا تھا کہ میرا پیاس کی وجہ سے گلا خشک ہو رہا ہے جبکہ بھوک بھی محسوس ہو رہی ہے۔

یہی سوال کیوی کپتان کین ولیمسن سے پوچھا گیا تو انہوں نے جواب دیا کہ وہ روزہ رکھ کر بہت اچھا محسوس کر رہے ہیں۔خیال رہے کہ غیر مذاہب سے تعلق رکھنے والے افراد میں روزے رکھنے کا رجحان بڑھتا جا رہا ہے۔ ابھی حال ہی میں بھارت کے مشور سیاستدان لالو پرساد یادیو کی صاحبزادی نے کہا ہے کہ انھیں یقین ہے کہ ان کے والد کی ضمانت رمضان المبارک کی برکتوں کی وجہ سے ہی ممکن ہو سکی ہے۔

اس خبر پر اپنی رائے کا اظہار کریں