تعلیم نہ صرف ہر قسم کی ترقی کی بنیاد ہے بلکہ ایک قومی احساس ذمہ داری کا نام بھی ہے گورنر بلوچستان

کوئٹہ27 جون: گورنربلوچستان امان اللہ خان یاسین زئی نے کہا ہے کہ تعلیم نہ صرف ہر قسم کی ترقی کی بنیاد ہے بلکہ ایک قومی احساس ذمہ داری کا نام بھی ہے۔ دونوں صورتوں میں اساتذہ اکرام کے کلیدی کردار کو نظرانداز نہیں کیا جاسکتا. گورنر یاسین زئی نے کہا کہ ہم صوبہ بھر کی پبلک سیکٹر یونیورسٹیز کے تمام اساتذہ اکرام کو درپیش مسائل ومشکلات سے نہ صرف بخوبی آگاہ ہیں بلکہ انکے پائیدار حل کیلئے سنجیدہ کاوشیں بھی کررہے ہیں۔ ان خیالات کا اظہار انہوں نے ہفتہ کے روز گورنرہاوس کوئٹہ میں رکن صوبائی اسمبلی اور سابق وزیر اعلیٰ نواب محمد اسلم رہیسانی کی قیادت میں یونیورسٹی آف بلوچستان اور لسبیلہ یونیورسٹی کے پروفیسرز پر مشتمل وفد سے گفتگو کرتے ہوئے کیا۔ اس موقع پر گورنر بلوچستان نے کہا کہ قوموں کا روشن مستقبل براہ راست تعلیم اور تعلیمی اداروں سے وابستہ ہوتا ہے لہٰذا تعلیم کے شعبے میں میرٹ کی پامالی اور اقرباء پروری کی قطعاً کوئی گنجائش نہیں ہے. اساتذہ کی تعیناتی سے لیکر اسٹوڈنٹس کے داخلوں تک میرٹ کی پاسداری ہماری اولین ترجیح رہی ہے. گورنر بلوچستان امان اللہ خان یاسین زئی نے کہا کہ ہماری بھرپور توجہ اور شعوری کاوشوں سے صوبہ کے اعلیٰ تعلیمی اداروں میں صحتمند تعلیمی ماحول کو فروغ ملا. اس ضمن میں یونیورسٹیوں کے اساتذہ اکرام اور اسٹوڈنٹس کو تمام ضروری سہولیات فراہم کرنا اور ان کی مشکلات کو ترجیح بنیادوں پر حل کرنا ہماری اولین ذمہ داری ہے. گورنر یاسین زئی نے معاشرے کے تمام روشنفکر حضرات پر زور دیا کہ وہ آگے آئیں اور سماج میں بردباری، اختلاف رائے کا احترام اور جمہوری رویوں کے فروغ کیلئے اپنا بھرپور کردار اداکریں۔